గిరిజన కాలనీలో ఇంటింటికీ వెళ్లి పెన్షన్ల పంపిణీ చేసిన ఎమ్మెల్యే ప్రశాంతి రెడ్డి

ముఖ్యమంత్రి నారా చంద్రబాబు నాయుడు నేతృత్వంలోని కూటమి ప్రభుత్వ పాలనలో ఒకవైపు అభివృద్ధి, మరోవైపు సంక్షేమం సమపాళ్లలో సాగుతున్నాయని కోవూరు శాసనసభ్యురాలు వేమిరెడ్డి ప్రశాంతిరెడ్డి తెలిపారు. బుచ్చిరెడ్డిపాళెం మండలం ఇసుకపాళెంలో ప్రభుత్వం ప్రతిష్టాత్మకంగా నిర్వహిస్తున్న ‘ప్రజా సేవలో’ కార్యక్రమంలో బుధవారం ఆమె పాల్గొన్నారు. ఈ సందర్భంగా లబ్ధిదారుల ఇళ్లకు స్వయంగా వెళ్లిన ఎమ్మెల్యే, వారికి ఎన్టీఆర్ భరోసా పెన్షన్లను పంపిణీ చేశారు. అంతకుముందు గ్రామానికి చేరుకున్న ఆమెకు కూటమి నాయకులు, కార్యకర్తలు, స్థానికులు ఘనస్వాగతం పలికారు.

ఈ సందర్భంగా ఎమ్మెల్యే వేమిరెడ్డి ప్రశాంతిరెడ్డి మాట్లాడుతూ.. ప్రజల వద్దకే స్వయంగా ప్రజాప్రతినిధులు వెళ్లేలా ‘ప్రజా సేవలో’ కార్యక్రమాన్ని ముఖ్యమంత్రి చంద్రబాబు నాయుడు రూపకల్పన చేశారన్నారు. ఈ కార్యక్రమంలో భాగంగా ప్రతి ఎమ్మెల్యే తమ నియోజకవర్గంలోని గ్రామాల్లో పర్యటించి, క్షేత్రస్థాయి సమస్యలను తెలుసుకుంటూ ప్రజలతో మమేకం అవుతారని వివరించారు. తాను ప్రతి నెలా ఒకటో తేదీన నియోజకవర్గ పరిధిలోని ఏదో ఒక గ్రామంలో ఎన్టీఆర్ భరోసా పెన్షన్ పంపిణీ కార్యక్రమంలో నేరుగా పాల్గొంటున్నట్లు చెప్పారు. తెలుగుదేశం ప్రభుత్వం ఎప్పుడూ పేదల ప్రభుత్వంగానే నిలుస్తుందని, రాబోయే రోజుల్లో అర్హులైన ప్రతి ఒక్కరికీ కొత్త పింఛన్లతో పాటు నిరుపేదలకు పక్కా ఇళ్లను కూడా ప్రభుత్వం మంజూరు చేయనుందని స్పష్టం చేశారు.

ఇసుకపాళెం గ్రామంలో రూ.1.54 కోట్ల అభివృద్ధి పనులు

ఇసుకపాళెం పరిధిలో జరిగిన అభివృద్ధిని ఎమ్మెల్యే ప్రశాంతిరెడ్డి ఈ సందర్భంగా మీడియాకు వివరించారు. గ్రామంలో ఎన్నో ఏళ్లుగా తాగునీరు లేక ఇబ్బందులు పడుతున్న ప్రజల సమస్యను గుర్తించి, తక్షణమే తాగునీటి సౌకర్యాన్ని కల్పించామన్నారు. దీనిపై స్థానిక ప్రజలు హర్షం వ్యక్తం చేస్తున్నారని తెలిపారు. అలాగే పంచాయతీరాజ్ నిధుల ద్వారా రూ.53 లక్షల వ్యయంతో 10 సీసీ రోడ్ల నిర్మాణం చేపట్టామని, రూ.36 లక్షలతో విలేజ్ హెల్త్ సెంటర్‌ను నిర్మించామని వెల్లడించారు. వీటితో పాటు విద్యుత్ శాఖ తరఫున రూ.30 లక్షలతో, జలవనరుల శాఖ ద్వారా రూ.35 లక్షలతో పలు అభివృద్ధి పనులు వేగంగా జరుగుతున్నాయని తెలిపారు. అనారోగ్యంతో బాధపడుతున్న గ్రామానికి చెందిన 10 మంది బాధితులకు రూ.10 లక్షల విలువైన ముఖ్యమంత్రి సహాయ నిధి (CMRF) చెక్కులను అందజేశామన్నారు. ఇసుకపాళెంలో ఒకే ఇంట్లో ముగ్గురు ఆడపిల్లలు ఉన్న కుటుంబానికి ‘తల్లికి వందనం’ మంజూరైందని, అలాగే ఏడాదికి మూడు ఉచిత గ్యాస్ సిలిండర్ల పథకం కూడా అందుతోందని పేర్కొన్నారు.

ఓటు హక్కుపై అశ్రద్ధ వద్దు – ‘SIR’పై అవగాహన

నియోజకవర్గవ్యాప్తంగా ప్రస్తుతం జరుగుతున్న స్పెషల్ ఇంటెన్సివ్ రివిజన్ (SIR) ఓటర్ల సవరణ ప్రక్రియపై ప్రతి ఒక్కరూ అవగాహన కలిగి ఉండాలని ఎమ్మెల్యే సూచించారు. ప్రతి పౌరుడు ఓటర్ల జాబితాలో తమ ఓటు ఉందో లేదో పరిశీలించుకోవాలని, ఇంట్లోని అర్హులైన యువతీ యువకులతో కొత్త ఓట్లను నమోదు చేయించుకోవాలని కోరారు. ఓటు హక్కు సక్రమంగా ఉంటేనే ప్రభుత్వ సంక్షేమ పథకాలు అందుతాయని, ఇందులో ఎలాంటి అశ్రద్ధ చేయవద్దని హెచ్చరించారు. గ్రామంలోని బూత్ లెవెల్ ఆఫీసర్లకు (BLO) ప్రజలు పూర్తిగా సహకరించి ఖచ్చితమైన వివరాలను అందజేయాలని కోరారు. ఈ కార్యక్రమంలో స్థానిక ప్రభుత్వ అధికారులు, కూటమి పార్టీల ముఖ్య నాయకులు, కార్యకర్తలు మరియు పెద్ద సంఖ్యలో గ్రామ ప్రజలు పాల్గొన్నారు.